Pas rritjes drastike të çmimeve të naftës dhe gazit për shkak të bllokadës në Ngushticën e Hormuzit, Bashkimi Europian po përpiqet të parandalojë ndikimet e mëtejshme të konfliktit që ndodh në Lindjen e Mesme, por pasojar e të cilit po ndihen në të gjithë botën. Blloku ka promovuar disa masa mbrojtëse. Një prej tyre sipas draft- propozimit, është detyrimi për të punuar në distancë të paktën një ditë në javë. Plani i njohur si "Accelerate EU" është hartuar nga Komisioni Europian dhe pritet të paraqitet në 22 prill, me qëllimin të gjenden mënyra për të përballuar krizën energjetike që e ka prekur tashmë kontinentin e vjetër. Masat që Brukseli rekomandon me forcë edhe uljen e cmimit të biletave për transportin publik, reduktimin e numrit të makinave në rrugë, uljen e konsumit të karburantit, si dhe kompensime për familjet në nevojë, për t`i ndihmuar në mbulimin e kostove në rritje. Qëllimi është të inkurajohet zvogëlimi vullnetar i konsumit, veçanërisht për përdorimin e energjisë në shtëpi dhe transportin. Brukseli këshillon po ashtu qytetarët të shmangin lëvizjet në orët e pikut. Për bizneset, theksohet nevoja për më shumë efikasitet, ndërsa administratave u rekomandohet të "japin shembullin e tyre në lidhje me përdorimin e energjisë dhe ndriçimin". Plani, aktualisht vetëm një draft, nuk duhet të miratohet domosdoshmërisht nga shtetet anëtare. Refuzimi i parë ndërkohë erdhi nga Spanja, e cila kundërshton detyrimin e punës në distance, por thotë se kriteri për këtë duhet të jetë vullnetarizmi.