Teksa mijëra emigrantë hyjnë ilegalisht në SHBA çdo ditë, më shumë se 11,000 njerëz vazhdojnë të presin ende në kampet që ndodhen në anën meksikane të kufirit. Me Uashingtonin që ende nuk ka një vendim zyrtar sa I takon të ardhmes së ligjit të migracionit, mijëra emigrantë dhe azilkërkues presin dritën jeshile nga administrata Biden për të hyrë në territorin e SHBA. Sipas CNN, shumë prej këtyre njerëzve po jetojnë në kushte të vështira duke sfiduar dhe të ftohtin ndërsa presin një përgjigje pozitive nga aplikacioni CBP One, I cili automatizon takimet e azilantëve me patrullën kufitare. Por ngarkesa e aplikacionit ka bërë që shumë prej emigrantëve të humbasin durimin dhe të tentojnë të kalojnë kufirin në mënyrë ilegale. Edhe pse autoritetet vendosën që të pezullojnë linjat hekurudhore si dhe të mbyllin përkohësisht të gjitha portat e kalimit në kufirin shba-Meksikë, kalimet ilegale nuk janë ndalur por kanë ardhur në rritje. Madje situata po përdoret dhe nga trafikantët të cilët po I nxisin emigrantët që të kalojnë kufirin dhe të mos presin. CNN raporton gjithashtu se kriza për trajtimin e kësaj çështje pritet të thellohet pasi grupe të mëdha emigrantësh po vazhdojnë të mbërrijnë me tren në kufirin me Meksikën çdo ditë. Për këtë problematikë, Presidenti meksikan Obrador do të ketë një takim me sekretarin amerikan të shtetit, Antony Blinken si dhe përfaqësues të sigurisë kombëtare. Pamjet: AFP