Teksa shohim pamjet e refugjatëve ukrainas që mbërrijnë me makina apo dhe në këmbë në Poloni, vështirë të mos na kthehet në kujtesë Lufta e Dytë Botërore, koha kur rajoni u shkatërrua nga luftimet, kur pati një uri masive, dhe kur miliona ukrainas vdiqën nga uria. Sot për fat të mirë nuk jemi pranë kësaj pike, thotë New York Times, megjithatë ndërprerjet e furnizimit me ushqime nuk do të mbeten episode të izoluara. Ajo që po ndodh në Ukrainë, do të ketë pasoja të gjera në shumë vende, dhe po e kërcënon që tani furnizimin në shtetet më pak të zhvilluara, që varen prej eksportit të drithërave dhe produkteve të tjera ushqimore, si nga Ukraina ashtu edhe Rusia. Rajoni i Detit të Zi është aktualisht një qendër shumë e rëndësishme e prodhimit dhe tregtisë globale të produkteve bujqësore, dhe Ukraina konsiderohet një nga “hambarët” që ka bota. Aktualisht, ajo dhe Rusia përbëjnë 29 për qind të eksporteve globale të grurit, e kontribuojnë në të njëjtën kohë me 19 për qind të prodhimit global të misrit, dhe 80 për qind të eksporteve globale të vajit të lulediellit. Tregjet globale të produkteve ushqimore vetëm pak ditë pas nisjes së luftimeve në Ukrainë, u tronditen krejtesisht. Javën e kaluar, u ndalua transporti në Detin Azov dhe cmimet në kontratat e reja të blerjes së grurit kapërcyen me 12 për qind në Bordin e Tregtisë në Çikago. Cmimet e ushqimeve kishin pësuar sakaq rritje për shkak të pandemisë së koronavirusit, por edhe faktit që vaji i palmës dhe sojës po përdoret shumë si biokarburant në BE, dhe misri për prodhimin e etanolit në Shtetet e Bashkuara. Indeksi CRB dhe S&P GSCI, të dy barometra të rëndësishëm për cmimin e lëndëve te para globale, u rriten me ritëm të paprecedent që nga 2014 dhe janë në rrugen e duhur për të thyer rekordin për rritjen më të madhe brenda një jave.