Pesë anëtarë të një familje - përfshirë një tetë vjeçar - janë vrarë me armë në qytetin Klivlend të Teksasit pasi i kërkuan fqinjit të tyre të ndalonte të shtënat me armë zjarri në kopshtin e tij në një orar kur duhet të vinin fëmijët në gjumë. Policia amerikane po kërkon për autorin e dyshuar një 38-vjeçar, shtetas meksikan të identifikuar si Francisco Oropeza. Gjykata ka lëshuar edhe një urdhër arresti për 38-vjeçarin ndaj të cilit rëndojnë 5 akuza për vrasje Policia tha se i dyshuari përdori një pushkë për të qëlluar brenda shtëpisë në Klivlend, ku ndodheshin 10 persona me origjinë nga Hondurasi, 5 prej të cilëve mbetën të vdekur. Policia specifikoi se në dhomat e gjumit gjeti dy gra të vrara të cilat poshtë trupave të tyre kishin fshehur dy fëmijë, që fatmirësisht i shpëtuan vdekjes. Konfrontimi i familjes nga Hondurasi me fqinjin meksikan ndodhi kur i kërkuan të ndalonte të shtënat me armë në oborrin e tij. Kur i dyshuari u përgjigj se mund të bënte c’të donte pasi ishte në pronën e tij, një prej familjarëve nisi ta filmojë dhe pikërisht aty ndodhi tragjedia, sqarojnë autoritetet.