Sekretari i përgjithshëm i OKB, Antonio Guterres ka vendosur sot një kurorë në vendin e shpërthimit shkatërrimtar të 4 gushtit, 2020 në portin e Beirutit. Guterres vizitoi Libanin e përfshirë nga kriza ekonomike duke dënuar liderët politikë që sipas tij "paralizojnë vendin përballë vuajtjes së popullit". "Kam ardhur me një mesazh të thjeshtë: OKB qëndron në solidaritet me popullin e Libanit," tha Guterres në konferecën e shtypit me presidentin Michel Aun. "Duke parë vuajtjen e popullit të Libanit, liderët politikë nuk kanë të drejtë të përçahen duke paralizuar vendin”, tha ai. Ai shtoi se objektivi i takimeve të tij do të jetë të diskutojë sesi “mund të mbështetet populli i Libanit në kushtet aktuale të krizës ekonomike". Banka Botërore thotë se Libani është në një krië të rëndë ekonomike e shkaktuar nga nepotizmi dhe korrupsioni i klasës qeveritëse. Rreth 80 përqind e popullsisë së Libanit llogritet se jeton nën linjën e varfërisë. "Populli libanez pret që liderët të rivendosin ekonominë dhe institucionet funksionale të vendit," tha Guterres. Qeveria e Libanit nuk është mbledhur prej tetorit, kryesisht prej konfliktit mbi gjykatësin që heton shpërthimin ku u vranë 215 njerëz në gusht 2020.