Presidenti amerikan Donald Trump është kritikuar ashpër pas një postimi në mediat sociale, ku i bën jehonë deklaratës së Napoleon Bonapartit se “ai që shpëton vendin e tij nuk duhet të shkelë asnjë ligj”. Kjo frazë i atribuohet udhëheqësit ushtarak francez, i cili krijoi Kodin Napoleonik të së drejtës civile në 1804 përpara se të shpallej perandor. Postimi erdhi në fund të një jave tjetër të trazuar në fillim të presidencës së dytë të Trump, gjatë së cilës kolegët vunë në dyshim legjitimitetin e gjyqtarëve që merrnin një sërë vendimesh. Sfidimi i tij ndaj disa prej atyre urdhrave , duke përfshirë atë që urdhëron rivendosjen e fondeve për organe të tilla si Instituti Kombëtar i Shëndetësisë, ka bërë që disa nga kundërshtarët e presidentit të shpallin një krizë kushtetuese. “Ai është presidenti më i paligjshëm në historinë e SHBA-së. Në sistemin tonë të qeverisjes, i takon gjykatave të përcaktojnë nëse presidenti po e përdor pushtetin e tij ‘legjitimisht’, jo presidenti”, deklaroi Robert Reich, një ish-sekretar amerikan i punës. “Ka folur si një diktator i vërtetë”, shkroi senatori Adam Schiff i Kalifornisë, një kundërshtar i hershëm i Trump, në X. Ndërsa Trump thotë se ai i përmbahet vendimeve të gjykatës, këshilltarët e tij kanë sulmuar gjyqtarët në mediat sociale dhe kanë bërë thirrje për shkarkimin e tyre.