Deklarata e fundit e Donald Trump, e cila krahasoi sulmet amerikane ndaj objekteve bërthamore iraniane me bombat atomike të hedhura në Hiroshima dhe Nagasaki në fund të Luftës së Dytë Botërore, shkaktoi një reagim të fortë në Japoni, dhe veçanërisht në Hiroshima. Kryebashkiaku i Hiroshimës, Kazumi Matsui, i ka bërë thirrje presidentit amerikan të vizitojë qytetin për të parë pasojat e katastrofës bërthamore. Ai deklaroi se një vizitë në Hiroshima mund ta ndihmojë atë të kuptojë “çfarë është në të vërtetë një bombardim bërthamor” dhe të ndjejë “përvojën e këtij qyteti”. Më 6 gusht 1945, Shtetet e Bashkuara hodhën një bombë atomike në Hiroshima dhe tre ditë më vonë në Nagasaki. Këto ishin incidentet e vetme në histori ku armët bërthamore u përdorën në luftë. Japonia u dorëzua pak kohë më pas, duke i dhënë fund Luftës së Dytë Botërore. Numri i viktimave ishte tronditës, afërsisht 140 mijë persona u vranë në Hiroshima dhe 74 mijë në Nagasaki, shumë prej të cilëve vdiqën javë ose edhe muaj më vonë nga efektet e rrezatimit. Më 22 qershor, pas një serie sulmesh izraelite ndaj objektivave brenda Iranit, SHBA-të nisën sulme ajrore ndaj tre objekteve bërthamore iraniane. Disa ditë më vonë, një armëpushim midis Iranit dhe Izraelit hyri në fuqi pas 12 ditësh luftime. “Nuk dua të përdor shembullin e Hiroshimës ose Nagasakit, por në thelb ishte e njëjta gjë. Kjo i dha fund luftës”, tha Trump në samitin e NATO-s në Hagë Deklaratat e presidentit amerikan shkaktuan zemërim në Hiroshima. Të mbijetuarit e bombardimeve bërthamore morën pjesë në protesta, ndërsa këshilli i qytetit miratoi një rezolutë që dënonte çdo përpjekje për të justifikuar përdorimin e bombës atomike.