Partia Demokratike është ankuar sërish për procesin zgjedhor të 11 majit, duke i drejtuar Komisionit Qendror të Zgjedhjeve një kërkesë zyrtare për verifikimin e fletëve të votimit. Sipas PD-së, mungojnë mbi 130 mijë fletë votimi për zgjedhësit brenda vendit, duke kërkuar nisjen e një hetimi administrativ dhe kontrollin e përmbajtjes së të gjitha kutive në rang kombëtar. Disa orë më pas reagoi KQZ duke dhënë sqarime të detajuara mbi numrin e fletëve të papërdorura, e duke theksuar se raportimi është bërë mbi bazën e procesverbaleve të çdo qendre votimi. “Numri prej 1,935,328 fletë votimi të papërdorura përfshin vetëm sasinë e raportuar nga çdo QV në përfundim të procesit zgjedhor”, thuhet në përgjigjen zyrtare të KQZ-së. Sipas të dhënave të mëtejshme të paraqitura nga KQZ: - 27,340 fletë votimi janë të papërdorura në 74 QV ku u aplikua votimi elektronik – konkretisht në ZAZ Nr. 27 (Bashkia Vorë) dhe ZAZ Nr. 41 (Njësia Administrative nr.10, Tiranë). - 99,455 fletë votimi janë gjithashtu të papërdorura në 233 QV, por në procesverbalet përkatëse është shënuar gabimisht numri “0”. - 5,369 fletë votimi konsiderohen të papërdorura, por janë të pasqyruara me gabime në testet logjike dhe procesverbalet e 1,380 QV-ve. KQZ thekson se këto saktësime janë bërë për të garantuar transparencën dhe për të reflektuar saktë raportimin në dokumentacionin zyrtar.