Kosova ka shpallur "non grata" ministren e Serbisë pas deklaratave të saj fashiste. Snezana Paunoviçit i është ndaluar përgjithmonë hyrja në Kosovë pasi një ditë më pare deklaroi se "po të ishte në vend të Millosheviçit do ta spastronte etnikisht Kosovën". Ministri në detyrë i Punëve të Brendshme, Xhelal Sveçla tha se gjuha e Paunoviçit është vazhdimësi e një politike shtetërore që për shumë dekada ka prodhuar dhunë, krime dhe përpjekje për zhdukjen e shqiptarëve nga trojet e tyre. “Si Ministër i Punëve të Brendshme i Republikës së Kosovës, sot kam nxjerrë vendim përmes së cilit Snezana Paunović kam shpallur persona non grata, të padëshirueshëm, me ndalim të përhershëm të hyrjes në apo kalimit tranzit përmes Republikës së Kosovës. Epoka kur shqiptarët shtypeshin, masakroheshin dhe spastroheshin etnikisht ka përfunduar njëherë e përgjithmonë”, ka shkruar Sveçla. Deklaratën fashiste të ministres së pushtetit lokal në Serbi e ka dënuar edhe Bashkimi Evropian që thanë se në Evropë nuk ka vend për retorikë që arsyeton ose promovon spastrimin etnik. Nga ana tjetër, ka reaguar edhe Komisionerja për Zgjerim e Bashkimit Evropian, Marta Kos, duke u shprehur se deklaratat e ministres serbe janë të papranueshme dhe në kundërshtim me vlerat mbi të cilat është ndërtuar Bashkimi Evropian.