Pas dështimit të zgjedhjes së presidentit të ri, Kosova shkon në zgjedhje. Kuvendi u shpërnda në mesnatë e tash ushtruesja e detyrës së presidentes, Albulena Haxhiu duhet të shpallë datën e zgjedhjeve. Për këtë, Haxhiu ka takuar të mërkurën kryetarin e Komisionit Qendror të Zgjedhjeve, Kreshnik Radoniqin, por duhet të zhvillojë konsultime edhe me krerët e partive politike. Sipas njohësve, Albulena Haxhiu ka kohë dhjetë ditë të mbajë takime e të caktojë datën e zgjedhjeve. "Tashmë që Kuvendi konsiderohet i shpërndarë me efekt kushtetues, Ushtruesja e Detyrës së Presidentit ka afat 10 ditë për të caktuar datën e zgjedhjeve, pas konsultimit me partitë politike dhe KQZ-në", ka sqaruar Eugen Cakolli nga Instituti Demokratik i Kosovës. Sipas ligjit për zgjedhjet e përgjithshme dhe Kushtetutës së Kosovës, zgjedhjet e parakohshme duhet të mbahen jo më herët se 30 ditë nga shpërndarja e Kuvendit e jo më vonë se 45 ditë. Sipas afateve në rastin konkret, Kosova shkon në zgjedhje më 31 maj ose 7 qershor. Pas shpërndarjes së Kuvendit, ky institucion është jo funksional e rrjedhimisht edhe qeveria është në dorëheqje e me fushëveprimtari të kufizuar. "Deri në mbajtjen e zgjedhjeve dhe krijimin e institucioneve të reja – që do të marrë kohë të paktën tre-katër muaj – shteti do të jetë në pauzë", ka paralajmëruar Cakolli. Në periudhën prej 16 muajsh, Kosova organizon pesë procese zgjedhore, tre parlamentare e dy rrethe zgjedhjesh lokale.