Ushtruesja e detyrës së presidentes së Kosovës, Albulena Haxhiu, e përshkroi anëtarësimin e vendit në NATO si çështje e sigurisë afatgjatë, paqes në rajon dhe vendosjes së Kosovës “mes shteteve demokratike”. Këto komente, ajo i bëri gjatë një takimi me dy kongresmenët amerikanë republikanin Keith Self dhe demokratin Suhas Subramanyam, që mbërritën në Prishtinë pasi kishin vizituar më parë Luginën e Preshevës në kuadrin e një turi të tyre në rajon. Haxhiu e falënderoi Keith Self për mbështetjen ndaj rrugës së Kosovës drejt NATO-s, si dhe për vëmendjen e treguar ndaj të drejtave të shqiptarëve në Serbi. Ajo theksoi se Kosova mbetet e përkushtuar për forcimin e partneritetit me Shtetet e Bashkuara të Amerikës në fushat e sigurisë, mbrojtjes, ekonomisë, diplomacisë dhe integrimit euroatlantik. “Për Kosovën, miqësia me Shtetet e Bashkuara është si institucionale ashtu edhe personale. Populli ynë e kujton kush qëndroi pranë nesh në momentet më vendimtare të historisë sonë moderne”, është shprehur Haxhiu. Gjatë vizitës në Kosovë, Self dhe Subramanyam u takuan edhe me kryeministrin në detyrë Albin Kurti dhe zëvendëskryeministrin Glauk Konjufca. Vizita e tyre vjen pas një rezolute të propozuar në prill nga Keith Self së bashku me kongresmenët Ritchie Torres dhe Mike Lawler, e cila synon të avancojë rrugën e Kosovës drejt anëtarësimit në NATO.