Një rast i shitjes së produkteve të skaduara dhe mallrave kontrabandë është goditur në qytetin e Korçës. Nga kontrollet e ushtruara në marketin e një 50-vjeçari në Korçë, Autoriteti Kombëtar i Ushqimit gjeti produkte të cilat ishin të skaduara, të cilat tregtari vijonte t’i tregtonte. AKU-ja zbuloi se tregtari kishte ndërhyrë tek këto produkte duke ndërruar stampat me datat e skandencës, duke rrezikuar kështu seriozisht shëndetin e blerësve. Në market AKU-ja gjeti një sasi të konsiderushme mallrash dhe produktesh industriale dhe ushqimore, nga të cilat një pjese i kishte kaluar afati i skadencës, pije alkoolike dhe energjike të dyshuara të kontrabanduara dhe fishekzjarre që tregtoheshin pa licencën e posaçme. Këto mallra dhe produkte u sekuestruan në cilësinë e provës materiale, ndërsa tregtari në fjalë u vu në pranga. Ndërsa materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.