Një shtëpi e braktisur thuajse e rrënuar në fshatin Qatrom shërbente si strehë për emigrantët e paligjshëm që kalojnë kufirin e gjelbër me Greqinë dhe hyjnë në vend përmes Dardhës. Brenda kësaj ndërtese dërrasa e thasë shërbejnë si shtretër apo objekte të ndryshme dëshmojnë kushte të mjerueshme me të cilat përballen emigrantët e paligjshëm gjatë udhëtimit të tyre tranzitor nëpër Shqipëri në përpjekje për të depërtuar në shtete të ndryshme europiane. Në ndërtesën që duket disi e veçuar nga banesa të tjera të fshatit u gjetën 16 emigrantë të moshave dhe nacionaliteteve të ndryshme mes tyre njëri me probleme shëndetësore. Vendstrehimi i emigrantëve u zbulua nga policia kufitare e Korçës e cila konstatoi emigrantët që strehoheshim tek kjo ndërtesë në afërsi të Teqesë së Qatromit ndërsa gjatë ndërhyrjes u vu re se njëri prej tyre kishte ndrydhur këmbën. Menjëherë pas njoftimit nga policia kufitare, në vendngjarje mbërriti ambulanca për t’i dhënë emigrantit ndihmën e parë mjekësore. Sipas informacioneve Kontrollet e policisë në zonë vijojnë ende ndërsa emigrantët po dërgohen drejt Drejtorisë së Kufirit dhe Migracionit në Korçë për veprime të mëtejshme. Përveç kontrolleve për evidentimin e emigrantëve të paligjshëm, policia është fokusuar edhe tek identifikimi i personave që ndihmojnë këta shtetas për të lëvizur drejt Tiranës apo qyteteve të tjera të vendit.