Pas konsultimeve me partitë politike, Presidentja e Kosovës do të shpallë datën e zgjedhjeve të rregullta që pritet të mbahen në fillim të vitit të ardhshëm. Liderët e partive të mërkurën u pajtuan për datat e propozuara nga presidentja që janë 26 janari, 2, 9 dhe 16 shkurti 2025. DEK VJOSA OSMANI PRESIDENTE E KOSOVËS Nga partitë prezentë nuk u kërkua konsultim shtesë, u pajtuam që, pasi si presidencë, si institucion për shpalljen e zgjedhjeve, ta bëjmë analizën e të gjitha datave dhe elementeve përkatëse që mund të jenë me rëndësi për qytetarët dhe ta bëjmë publike datën sa i përket zgjedhjeve Në këtë takim mungoi kryeministri i Kosovës, Albin Kurti si drejtues i Lëvizjes Vetëvendosje. Osmani tha se ky i fundit nuk i dha arsye, derisa bëri të ditur se nënkryetarit, Glauk Konjufcës iu mohua pjesëmarrja. DEK VJOSA OSMANI PRESIDENTE E KOSOVËS Secili kryetar i partisë i përcakton prioritetet e veta, kryeministri ka përcaktuar prioritet tjetër, këtë përgjigje ua paskan dhënë juve, ne nuk e kemi, një tjetër është që nuk ka qenë në Kosovë, por qenka. Nga Zyra e Kryeministrit thanë se Kurti të mërkurën ishte në darkë me ambasadorët e akredituar në Kosovës. Në takim nuk mori pjesë as Lista Serbe, Partia Egjiptiane IRDK dhe dy parti të tjera, por këto të fundit kishin dërguar qëndrimet e tyre me shkrim. Liderët e partive opozitare propozuan 26 janarin e vitit 2025 si datën më të përshtatshme për zgjedhjet e rregullta. DEK MEMLI KRASNIQI KRYETAR, PDK Nga katër datat që janë opsione kemi propozuar datën 26 janar si datën më optimale duke qenë se është edhe data e parë e cila lejon mundësinë mbajtjes së zgjedhjeve të rregullta. "Kjo është data e parë në përputhje me afatet ligjore. Të njëjtin qëndrim e shprehën edhe partitë tjera opozitare", tha Ramush Haradinaj kryetari i Aleancës për Ardhmërinë e Kosovës. “Propozova datën 26 janar 2025 si datë të zgjedhjeve të ardhshme”, tha edhe Kryetari i LDK-së, Lumir Abdixhiku. Partitë e pakicave joserbe në takim u shprehën se janë të gatshme të pranojnë datën e shumicës, apo datën që e përcakton Presidentja. Nga ky takim po ashtu u kuptua se nuk ka vullnet për zgjedhje të jashtëzakonshme në vend dhe se sipas Presidentes së Kosovës, përgatitjet për zgjedhjet e rregullat kanë filluar.