Një konflikt me armë zjarri është shënuar mes dy personave në qendër të qytetit të Peqinit, mesditën e së premtes, fatmirësisht pa të lënduar. Policia bën me dije se në konflikt janë përfshirë Leonard Elezi 50 vjec dhe Adriatik Ceka 40 vjec ndërsa shton se Ceka ka qëlluar me armë në ajër për të trembur 50 vjeçarin. Por në vendngjarje janë gjetur rreth 20 gëzhoja plumbash pistolete dhe automatiku çfarë të bën të mendosah se mes dy personave ka pasur shkëmbim zjarri, ose në të kundërt Ceka ka qenë i pajisur me dy armë. Ngjarja është shënuar në mes të ditës në lagjen “Xhami” dhe mund të kishte pasur pasoja të rënda teksa rikoshetat e plumbave janë përplasur edhe në pallatet ngjitur. Dëshmitarët thonë se i pranishëm gjatë konfliktit ka qenë dhe kryetari i Bashkisë së Peqinit Bukurosh Maçi i cili ka tentuar të shuajë konfliktin mes dy personave, njëri prej të cilëve i afërm i tij. Policia tashmë ka identifikuar personat e përfshirë në konflikt ndërsa është duke punuar për kapjen e tyre.