Pas vdekjes së 11 minatorëve nga një zjarr në një galeri nëntokësore në lindje të Rusisë, autoritetet ruse konfirmuan sot se kanë humbur jetën edhe 35 të bllokuar dhe gjashtë punonjës ndihme. Zyrtarët thanë se janë arrestuar pesë inspektorë sigurie të impjantit me akuza neglizhence kriminale. Rrjedhja e gazit në minierën e Lisvizhnia në rajonin siberian të Kemerovo ka vrarë tashmë 52 njerëz. Komisioni hetues tha se inspektorët nuk kishin kryer kontrollet e tyre periodike, ndërsa tre të tjerë u arrestuan të enjten, duke përfshirë drejtorin e nëndrejtorin e minierës. Minatorët ishin mbytur kur një tunel ventilimi u mbush me gaz dhe mori flakë, thanë zyrtarët, duke shtuar se besojnë se ka pasur një shpërthim të gazit metan. Punonjësit e emergjencës u detyruan sot të ndalonin kërkimet prej rrezikut të një shpërthimi teksa nxorrën në sipërfaqe trupat e minatorëve. Katër njerëz duke përfshirë dhe një punonjës shpëtimi, janë duke u trajtuar në kujdesin intensiv, tha agjencia vendase TASS. 285 njerëz besohet se ishin brenda minierës në kohën e shpërthimit të gazit, tha ministria e emergjencave, duke shtuar se 239 kishin arritur të dilnin në sipërfaqe.