Nuk ka surpriza, Parlamenti Europian miratoi përbërjen e re të Komisionit Evropian, të cilin do ta drejtojë edhe për 5 vite Ursula von der Leyen. Komisioni i ri Europian mori 370 vota pro dhe 282 kundër, ndërsa 38 abstenuan. Para votimit në seancë plenare u zhvillua një debat, në të cilin Ursula von der Leyen paraqiti edhe një herë përbërjen e Komisionit në mandatin e saj të dytë si presidente e ekzekutivit të BE-së. Shefja e BE-së Ursula von der Leyen që parashikohet të ketë një mandat më të vështirë se ai i pari nën drejtimin e një prej institucioneve më të rëndësishme të BE-së, për shkak të luftës së ashpër që grupet kryesore politike në Parlamentin Evropian kanë zhvilluar prej javësh për faktin se sa mund të anojë nga e djathta shumica e re e anëtarëve të komisionit që marrin detyrën. Një gjë e tillë u vu në pah edhe gjatë fjalimit të saj të sotëm ku nuk munguan debatet. Von der Leyen premtoi se Komisioni do të angazhohet për një Evropë më të fortë, më të sigurt, e cila do të rrisë investimet për mbrojtje dhe do të vazhdojë punën drejt uljes së niveleve të ndotjes së ambientit