10 të arrestuarit si pjesë e një grupi kriminal që trafikonin drogë nga vendet e Amerikës Latine do të dalin tw henwn përpara gjykatës për verifikimin e masave të sigurisë. Për grupin hetimor, 4 nga 7 shqiptarët e arrestuar janë kokat e grupit, organizatorë dhe financues të rrjetit kriminal të trafikut të kokainës drejt Shqipërisë, dhe më tej shitjen e saj në tregjet e vendeve europiane. Klajd Birçe, Geis Fejsullai, Aldi Zonja dhe Artion Çaushllari kishin ngritur infrastrukturën për transportimin, përpunimin dhe shitjen e lëndës narkotike. Droga që futej në Shqipëri nëpërmjet lëkurës së gjedhit, ekstraktohej më pas nga kimistët nga Venezuela dhe Kolumbia në laboratorin në Qerekë të Fushë Krujës. Materialet ndihmëse dhe vendet nga bëhej më pas shpërndarja e saj ishin dy banesa në Tiranë dhe Durrës. Nga hetimet ka rezultuar se 37-vjecari Aldi Zonja kishte shkuar në Amerikën Latine me vizë turistike dhe më pas ishte bllokuar atje për shkak të pandemisë. Gjatë kohës së qëndrimit në Amerikën Latine ai ka krijuar njohje me trafikantë droge me të cilët planifikoi skemën e mirëfilltë për të trafikuar lëndën narkotike.