Kina lëshoi këtë të premte një sondë në Hënë me qëllim mbledhjen e mostrave nga pjesë të largëta të Hënës, e para e këtij lloji, duke shtyrë kështu më tej programin ambicioz të Pekinit për të dërguar një mision me ekuipazh në Hënë deri në vitin 2030. Raketa që mbante sondën hënore Chang'e-6 u lëshua nga Qendra e Hapësirës, Uencan në provincën Hainan. Sonda Chang'e-6 synon të mbledhë rreth 2 kilogramë mostra hënore nga pjesë të largëta të Hënës me qëllim që t’i sjellë në Tokë për analiza të mëtejshme. Media shtetërore, Shinua, tha se ky është “misioni i parë i këtij lloji në historinë e eksplorimit të Hënës nga njeriu” dhe pritet të zgjasë për 53 ditë. Sipas projektuesve kinezë, bëhet fjalë për një mision të ndërlikuar, ndërsa sonda pritet të zbarkojë në Pellgun Aitken në polin jugor, që është një prej kratereve më të mëdha të ndikimit në sistemin diellor. Me të arritur atje, sonda kryejë eksperimente në zonën e zbarkimit dhe do të marrë mostra shkëmbinjsh, të cilat më pas nga Hëna do t’i nisë sërish në Tokë. Uashingtoni nga ana e tij e konsideron këtë lëvizje në hapësirë një përpjekje të Pekinit për të pasur një dominim në hapësirë, ndërsa përdoret si mbulesë për synime ushtarake. Shtetet e Bashkuara po ashtu po planifikojnë të rivendosin astronautë në Hënë deri në vitin 2026 me misionin e tyre Artemis 3.