Sulmi i ri i presidentit, Donald Trump ndaj CNN dhe veçanërisht ndaj korrespondentes së rrjetit amerikan të lajmeve në Pentagon, Natasha Bertrand, ka shkaktuar reagime të shumta. Përmes një postimi në platformën Truth Social, presidenti amerikan akuzoi dje gazetaren 33-vjeçare për përhapje “lajmesh të rreme” dhe kërkoi që ajo të pushohej nga puna “si qen”. Po kush është Natasha Bertrand? Sipas biografisë së saj në faqen e CNN, Natasha Bertrand është një korrespondente e sigurisë kombëtare për rrjetin, me seli në Uashington. “Natasha Bertrand ka mbuluar raste të profilit të lartë, duke përfshirë përdorimin e gjerë të bombave nga Izraeli në Gaza dhe mbulimin e çështjes së shtrimit në spital të Sekretarit të Mbrojtjes, Lloyd Austin. Ajo luajti një rol të rëndësishëm në zbulimin e dosjes së zhdukur të inteligjencës ruse gjatë administratës Trump dhe ishte pjesë e ekipit fitues të çmimit Emmy që mbuloi pushtimin rus të Ukrainës”, thotë biografia e saj. Në të kaluarën, Bertrand ka mbuluar sigurinë kombëtare dhe politikën për media të tjera, duke përfshirë POLITICO, The Atlantic dhe Business Insider. Ajo u diplomua në Kolegjin Vassar në vitin 2014 me një degë të dyfishtë në shkenca politike dhe filozofi. Ndërsa punonte në Business Insider, ajo u kritikua për raportimin e saj mbi të ashtuquajturin “dosja Steele”, e cila përmbante akuza për lidhjet e Trump me Rusinë. Në veçanti, gazetarja u akuzua se i kishte dhënë shumë besueshmëri dosjes, përmbajtja e së cilës nuk u vërtetua kurrë. Megjithatë, gazetaria ishte kritikuar edhe për disa raportime të tjera kontroverse në lidhje me “rrjedhjen” e emaileve që dyshohet se janë shkruar nga Hunter Biden, djali i ish-presidentit amerikan, Joe Biden. Ishte Bertrand ajo që dha lajmin se më shumë se 50 ish-zyrtarë të inteligjencës nënshkruan një letër duke shprehur mendimin se emailet “kishin të gjitha shenjat dalluese të një operacioni dezinformimi rus”. Raportet e mëvonshme nga New York Times dhe Washington Post konfirmuan vërtetësinë e disa prej emaileve të gjetura në laptop, i cili kishte qenë në posedim të FBI-së që nga viti 2019. Ndërsa FBI nuk ka lëshuar një deklaratë publike që konfirmon në mënyrë të qartë vërtetësinë e laptopit ose përjashton mundësinë e ndërhyrjes së huaj, nuk ka dalë asnjë provë për të mbështetur pretendimin se laptopi ishte pjesë e një fushate dezinformimi rus.