Një përplasje me armë zjarri ndodhi në qendër të kryeqytetit ukrainas, Kiev, mes dy prej shërbimeve më të fuqishme të sigurisë së vendit, Shërbimit të Sigurisë së Brendshme dhe Drejtorisë së Inteligjencës Ushtarake. Shkëmbimi i zjarrit la pas disa të plagosur, ndërsa presidenti i vendit, Volodymyr Zelensky, reagoi ashpër, duke e cilësuar incidentit si “të turpshëm” dhe kërkoi hetim të plotë. Sipas “The Guardian”, përplasja mes punonjësve të dy shërbimeve të sigurisë ndodhi gjatë natës dhe mëngjesit të së mërkurës në një lagje të qetë të Kievit. Shërbimi i Sigurisë fillimisht deklaroi se kishte bashkëpunuar me inteligjencën ushtarake për të parandaluar një “sulm terrorist” rus, por më vonë dha një version tjetër, duke thënë se agjentët e tij ishin përballur me një “grup personash” që po përpiqeshin t’i pengonin gjatë një kontrolli. Agjentë të njësisë elitare “Alpha” të shërbimit të brendshëm hapën zjarr dhe arrestuan tre persona që, sipas mediave, “i përkasin një prej njësive të forcave të mbrojtjes së Ukrainës”. Mediat ukrainase shkruajnë se incidenti duket se lidhet me arrestimin e Stepan Kaplunov, zëvendës komandant i Korpusit Vullnetar Rus, një njësi e nacionalistëve rusë që lufton për Ukrainën dhe është e lidhur me Inteligjencën Ushtarake. Avokati i Kaplunov tha se ai ishte arrestuar nga shërbimi i sigurisë së brendshme në fund të gushtit dhe ishte dërguar të mërkurën në apartamentin e tij për një kontroll. Pikërisht aty, sipas tij, oficerët e inteligjencës u përpoqën të pengonin hyrjen e punonjësve të sigurisë së brendshme, duke sjellë përplasjen me armë zjarri.