Inteligjenca Artificiale po përdoret gjithnjë e më shumë në industrinë muzikore, nga krijimi i melodive dhe zërave te prodhimi dhe përpunimi i këngëve. Por, ndërsa ky zhvillim duket se ofron mundësi të reja për artistët, po shtohen edhe shqetësimet për ndikimin e saj te krijimtaria njerëzore. Në këtë drejtim, Australia ka marrë tashmë një hap të rëndësishëm: këngët që janë krijuar tërësisht ose në pjesën më të madhe nga Inteligjenca Artificiale nuk do të lejohen më në listat zyrtare muzikore të vendit. Nga kjo javë, një këngë duhet të jetë “në mënyrë thelbësore e krijuar nga njerëzit” për të qenë e pranueshme në klasifikimet australiane. Vendimi është marrë nga Shoqata Australiane e Industrisë së Muzikës (ARIA), e cila thotë se rregullat e reja synojnë të mbrojnë dhe promovojnë natyrën njerëzore të artit muzikor. Vendimi vjen pas një polemike të madhe rreth një versioni të këngës së Madonna-s, “Like A Prayer”, të realizuar nga DJ australian Josh Faëaz. Kënga arriti në vendin e parë të klasifikimit dance të ARIA-s dhe në vendin e dytë në klasifikimin e përgjithshëm të Australisë. Ajo u bë gjithashtu pjesë e rëndësishme e listave të radiove komerciale dhe është dëgjuar më shumë se 48 milionë herë në Spotify. Pas reagimeve dhe kritikave, Faëaz shtoi më vonë kreditet që tregonin përdorimin e Inteligjencës Artificiale në realizimin e këngës. Sipas ARIA-s, artistët australianë po konkurrojnë për vëmendjen e publikut në një treg muzikor më të mbingarkuar se kurrë dhe organizata nuk dëshiron të promovojë suksesin e muzikës së gjeneruar nga AI kur asaj i mungon krijimtaria njerëzore. Megjithatë, rregullat e reja nuk e ndalojnë përdorimin e Inteligjencës Artificiale në muzikë. AI mund të përdoret si një mjet ndihmës, për sa kohë që kënga mbetet kryesisht produkt i punës njerëzore. Artistët duhet të kenë shkruar këngën, të kenë interpretuar vokalin kryesor dhe instrumentet kryesore. Përdorimi i teknologjive si auto-tune, makinat e baterive apo AI për masterizimin e këngëve mbetet i lejuar. Artistët gjithashtu do të duhet të deklarojnë përdorimin e AI kur dorëzojnë një këngë për klasifikim. Australia nuk është vendi i parë që ndërmerr një masë të tillë. Më herët gjatë këtij viti, një këngë u përjashtua nga klasifikimet muzikore në Suedi pasi u zbulua se ishte krijuar nga AI. Ndërkohë, Federata Ndërkombëtare e Industrisë Fonografike, IFPI, ka bërë të ditur se udhëzime të ngjashme për muzikën e krijuar me AI do të zbatohen edhe në vende të tjera, përfshirë Amerikën Latine, Lindjen e Mesme, Afrikën dhe Azinë Juglindore.