Komisioni Evropian reagoi për herë të parë lidhur me çështjen e ish-drejtoreshës së Shërbimit Informativ të Shtetit në Shqipëri, Vlora Hyseni, ndaj të cilës Gjykata e Posaçme Antikorrupsion ka caktuar masën e arrestit në shtëpi, nën akuzën për përkrahje të autorit të krimit dhe zbulim të të dhënave sekrete. Zëdhënësi i Komisionit Evropian, Guillamue Mercier, deklaroi nga Brukseli, në konferencën për shtyp të së premtes, se zhvillimet që lidhen me shtetin e së drejtës në Shqipëri ndiqen nga afër. “Siç e dini, ne nuk komentojmë çështje në vazhdim. Por mund të them se ndjekim nga afër zhvillimet që lidhen me shtetin e së drejtës, veçanërisht reformën në drejtësi dhe luftën kundër krimit të organizuar dhe korrupsionit, ku Shqipëria ka bërë përparim të konsiderueshëm”. Ndërsa vlerësoi punën e SPAK, ai shtoi se Komisioni Evropian ka besim në aftësinë e strukturave shqiptare për të hetuar dhe ndjekur penalisht rastet e korrupsionit dhe krimit të organizuar. “Kemi besim të plotë në aftësinë e Strukturës së Posaçme kundër Korrupsionit dhe Krimit të Organizuar, e njohur si SPAK, për të zbuluar, hetuar dhe ndjekur penalisht korrupsionin dhe krimin e organizuar”. Brukseli nuk komentoi në mënyrë specifike akuzat ndaj Hysenit, as pretendimet në lidhje me cenimin e mundshëm të informacioneve të partnerëve ndërkombëtarë, duke iu referuar parimit të moskomentimit të hetimeve në vijim. Reagimi i Komisionit Evropian vjen pas zbulimit të komunikimeve të Vlora Hysenit dhe biznesmenit Ergys Agasi, i hetuar në dosjen e prokurimeve të AKSHI-t.