Një fushatë e re mashtrimi kibernetik e tipit “sextortion” është zbuluar për herë të parë në Itali nga Cert-AgID, qendra e reagimit ndaj emergjencave kompjuterike pranë Agjencisë për Italinë Dixhitale. Mashtruesit dërgojnë email-e ku pretendojnë se kanë hakuar pajisjen e viktimës dhe se disponojnë materiale komprometuese. Ata hiqen si pjesëtarë të grupit të njohur kriminal kibernetik ShinyHunters, edhe pse ky i fundit ka mohuar çdo lidhje me këtë fushatë. Në mesazhet e dërguara, hakerët pretendojnë se kanë përdorur programe keqdashëse për të marrë të dhëna personale, historikun e navigimit në internet dhe regjistrime nga kamera e pajisjes. “Kemi zbuluar se ke vizituar faqe për të rritur dhe ke parë video eksplicite. Na dërgo 2 mijë dollarë në bitcoin për të hequr virusin nga pajisja jote”, thuhet në email-et mashtruese. Sipas ekspertëve, skema bazohet te frika dhe presioni psikologjik i përdoruesve, duke i detyruar ata të paguajnë për të shmangur publikimin e pretenduar të materialeve private. Grupi ShinyHunters, i njohur që prej vitit 2019 për sulme kibernetike ndaj kompanive dhe vjedhje të të dhënave, ka mohuar përfshirjen në këtë fushatë, duke theksuar se metodat dhe objektivat financiarë nuk përputhen me aktivitetet e tij të mëparshme. Cert-AgID u ka bërë thirrje qytetarëve që të mos reagojnë ndaj këtyre mesazheve, të mos kontaktojnë adresën e dërguesit dhe të mos kryejnë asnjë pagesë. “Injoroni ose fshini email-in, mos nisni asnjë komunikim me adresën dërguese dhe mos bëni asnjë lloj pagese”, është këshilla e autoriteteve italiane për përdoruesit.