Një mjet lundrues i braktisur u zbulua nga shërbimet e Policisë Kufitare të Kavajës në zonën bregdetare të fshatit Karpen. Veliera ngeci në rërë dhe u bllokua disa metra larg bregut, pasi ngriti dyshime për shkak të lëvizjeve të pakontrolluara që kryente në det. Policia Kufitare e Spilles ushtroi një kontroll të detajuar në bord, duke zbuluar një pistoletë gjermane të tipit “Walther,” municione, dy celularë, një laptop dhe dokumentet e mjetit. Gjithashtu në bord u gjet dhe një pasaportë gjermane me gjeneralitetet e një 85-vjeçari. Sipas hetimeve paraprake, mjeti lundrues ishte nisur nga Bari, Itali, me destinacion Kroacinë, por gjatë lundrimit kishte devijuar duke kryer lëvizje të çrregullta. Autoritetet shqiptare po bashkëpunojnë me Guardia di Finanza dhe Interpol Tiranën për të verifikuar të dhënat e pasaportës dhe për të përcaktuar vendndodhjen e poseduesit të saj, i cili dyshohet se është drejtuesi i velierës. Nga hetimet e para dyshohet se drejtuesi mund të ketë rënë në det për shkak të motit të keq me dallgë të larta në det të hapur. Prokuroria e Durrësit është vënë në dijeni dhe po vijon veprimet e mëtejshme ligjore për zbardhjen e plotë të rastit.