Momente dramatike kanë përjetuar banorët e një pallati 8 katësh në zonën e Komunës së Parisit në Tiranë. Një zjarr që ra rreth orës 18:00 në garazhin e pallatit u bë shkak për evakuimin e gjithë banorëve, ndërsa më e vështirë ishte ndërhyrja në katet e sipërme kur zjarrfikësit evakuuan me shkallë edhe një fëmijë. Si pasojë e tymit të përhapur nga zjarri, një zonjë shfaqi probleme me frymëmarrjen dhe u transportua në Qëndrën Spitalore Universitare Nënë Tereza për ndihmë më të specializuar, po ashtu edhe 4 banorë të tjerë shfaqën probleme më të lehta me frymëmarrjen. U desh afërsisht dy orë punë për të shuar zjarrin në garazh, ndërkohë që njëkohësisht u evakuuan të gjithë banorët. Zjarri shkrumboi 3 automjete të parkuara në garazh, dy prej tyre plotësisht, si dhe një motor. Paraprakisht dyshohet se zjarrin e shkaktoi një shkëndijë elektrike, por kjo është hera e dytë brenda pesë ditësh që bie zjarr në të njëjtin kompleks pallatesh Kika 1 dhe Kika 2 në Komunën e Parisit. Forcat zjarrfikëse, por edhe policia po vijojnë veprimet për të garantuar sigurinë dhe hetimin e plotë të rrethanave të kësaj ngjarje. Më 20 janar flakët përfshinë katin e katërt të një pallati te kompleksi "Kika 2". Nga flakët, të cilat u shkaktuan nga një defekt elektrik, u dogjën zyrat e një banke të nivelit të dytë në katin e 5-të dhe një restorant në katin e 6-të.