Teatri i Operas dhe Baletit nis sezonin artistik me katër shfaqje premierë përgjatë muajit janar. Trupa e Operas dhe Trupa e Baletit e nisin në 17 janar me një mbrëmje gala, i konceptuar si një dialog mes zërit, lëvizjes dhe muzikës, ku duetet më të njohura të repertorit operistik ndërthuren me kryevepra të baletit klasik dhe bashkëkohor. Ivana Hoxhaj, mezzo soprano – Do të ketë uvertura, duete, pjesë të shkëputura nga opera, edhe baleti do të ketë pjesë të përbashkëta dhe solo. Është një bashkim forcash artistike, të gjithë artistët në skenë plotësojnë një buqetë me lule. Programi përfshin vepra nga kompozitorë të njohur si Puccini, Verdi, Mozart, Donizetti. Ndërsa Ansambli i Këngëve dhe Valleve Popullore e nis këtë sezon me premierën “Ku ka si Tirona”, “Faleminderit Tiron”, një mozaik këngësh e vallesh, ku Tirana rrëfehet përmes ritmit dhe elementëve të trashëgimisë kulturore. Sokol Marsi, drejtori artistik i Ansamblit të Këngëve dhe Valleve - I dedikohet kryeqendrës së Shqipërisë, Tiranës bujare, bujare mikpritëse, me të gjitha zakonmet e saj, duke përfshirë këngën, vallen dhe të gjitha motivet e trashëgimisë shpirtërore të qytetit të Tiranës. Solistëve dhe valltarëve do t’u bashkohen disa të ftuar që do të përcjellin identitetin e një qyteti që ka frymëzuar breza.