Është rritur në 920 numri i viktimave nga tërmeti katastrofik në Venezuelë. Gjatë një takimi me ushtrinë dhe zyrtarët civilë, Presidentja e përkohshme e vendit, Delcy Rodriguez, njoftoi se në total janë konfirmuar 920 të vdekur, ndërsa ekipet e shpëtimit, të mbështetur nga ekipet ndërkombëtare, vijojnë kërkimet për të gjetur të mbijetuar të bllokuar nën rrënoja ndërtesash. Deri më tani, autoritetet kanë konfirmuar rreth 3 mijë të plagosur nga tërmeti i të mërkurës, ndërsa dhjetëra mijëra vijojnë të jenë nën rrënoja. Spitalet në vend janë të mbingarkuar, ndërsa mjekët i thanë BBC se furnizimet mjekësore ishin të pamjaftueshme për popullsinë. Në mesin e viktimave ka edhe shtetas të huaj, përfshirë nëntë shtetas të Portugalisë, tre të Spanjës, dy të Brazilit, dy të Kinës dhe një italiano-venezuelas. Një tërmet 7.2 ballësh goditi të mërkurën në mbrëmje, i ndjekur më pak se një minutë më vonë nga një tërmet tjetër 7.5 ballësh, më i fuqishmi që nga viti 1900, sipas Shërbimit Gjeologjik të Shteteve të Bashkuara (USGS). Ministri i Brendshëm tha se rreth 70.000 familje në shtetin La Guaira janë prekur nga tërmeti. La Guaira, shteti bregdetar ngjitur me Karakasin dhe vendndodhja e aeroportit kryesor të kryeqytetit, është ndër zonat më të goditura. "Është shndërruar në një zonë katastrofe", tha më herët presidentja Rodriguez, duke shtuar se Qeveria po bashkëpunon me kompani private për të sjellë pajisje të rënda dhe për të përshpejtuar operacionet e shpëtimit. Energjia elektrike është e kufizuar në disa pjesë të shtetit, ndërsa aeroporti i Karakasit është mbyllur për shkak të dëmtime të pësuara.