Mbi 900 të vdekur dhe qindra të zhdukur! Është ky bilanci tragjik i katastrofës natyrore të përmbytjeve në Indonezi, Tajlandë dhe Sri Lankë. Autoritetet vijojnë kërkimet për gjetjen e njerëzve të zhdukur nga përmbytjet shkatërruese dhe rrëshqitjet masive të dheut në të gjithë jugun e Azisë. Nga moti ekstrem, me shirat e rrëmbyeshëm të musoneve, që u përkeqësua nga një stuhi tropikale, kanë mbetur edhe mijëra njerëz të bllokuar, pa strehë dhe pa energji elektrike. Autoritetet pohuan se kjo është katastrofa më e keqe natyrore, që ka goditur ishullin në dy dekada, që nga cunami shkatërrimtar i vitit 2004, që iu mori jetën rreth 31 mijë njerëzve dhe la më shumë se një milion të pastrehë. Krerët e shtetit kanë shpallur gjendjen e jashtëzakonshme dhe janë zotuar të rindërtojnë çdo gjë të shkatërruar, me mbështetje ndërkombëtare. "Po përballemi me fatkeqësinë më të madhe dhe më sfiduese natyrore në historinë tonë. Sigurisht, do të ndërtojmë një komb më të mirë se ai që ekzistonte më parë”, tha presidenti i Sri Lankës, në një fjalim drejtuar kombit. Njerëzit e bllokuar kanë mbetur pa ushqim dhe pa ujë, pasi përmbytjet shkaktuan rrëshqitje toke, shkatërruan rrugët dhe linjat e komunikimit, duke vështirësuar dhe ndërhyrjet me mjete të rënda. Sezoni vjetor i musoneve, i cili zakonisht ndodh midis qershorit dhe shtatorit, shpesh sjell shira të rrëmbyeshëm, duke shkaktuar rrëshqitje toke dhe përmbytje të menjëhershme. Këtë vit, një stuhi tropikale ka përkeqësuar kushtet dhe numri i viktimave në Indonezi dhe Tajlandë renditet ndër më të lartat nga përmbytjet në vitet e fundit.