“Kasapi i Ballkanit”, Ratko Mladiç, do të varroset me të gjitha nderimet në Serbi, një vendim ky që ka shkaktuar reagime të forta e ka rikthyer në qendër të debatit plagët e hershme të luftrave ne rajon. Ish komandanti ushtarak i serbëve të Bosnjës, i dënuar për gjenocid, krime kundër njerëzimit dhe krime lufte, do të përcillet për në banesën e fundit me nderime më të larta ushtarake dhe shtetërore. Lajmin e bënë të ditur vetë autoritetet serbe, të cilat kanë deklaruar se si general, ai do të marrë “të gjitha nderimet që i takojnë”, sipas protokollit. Mladiç vdiq në moshën 84-vjeçare në Hagë, ku po vuante dënimin me burgim të përjetshëm. Në vitin 2017 qe shpalur fajtor dhe dënimi u konfirmua përfundimisht në apel në vitin 2021. Mes krimeve për të cilat u dënua ishte edhe gjenocidi i Srebrenicës, ku në korrik të vitit 1995 forcat serbo-boshanjake ekzekutuan më shumë se 8 mijë burra dhe djem boshnjakë, si dhe për krimet e kryera gjatë rrethimit të Sarajevës. E megjithatë, më shumë se tre dekada pas masakrës, fjala që erdhi nga Beogradi ishte: “nderime”. Por ceremonia zyrtare nuk është i vetmi element që ka ndezur polemikat. Në orët pas vdekjes së tij, një pjesë e mediave nacionaliste dhe pranë qeverisë në Serbi e kanë paraqitur Mladiçin si një martie, dhe disa politikanë shkuan edhe më tej. Ish-zëvendëskryeministri Aleksandar Vulin kërkoi që në Serbi të shpallej zi kombëtare. Në Republikën Srpska, entiteti serb i Bosnjë-Hercegovinës, u mbajtën ceremoni fetare në kujtim të tij, ndërsa Milorad Dodik e ka cilësuar vdekjen e 84 vjecarit si “vrasje”. Reagime mbërritën deri edhe nga stadiumet. Gjatë një ndeshjeje të Europa League, tifozët e Crvena Zvezdës së Beogradit shpalosën një banderolë me mesazhin: “Gjeneral, lavdi e përjetshme dhe faleminderit”, të shoqëruar me thirrje në mbështetje të Mlladiçit, cka bëri që Memoriali i Srebrenicës të paraqeste një ankesë pranë UEFA-s, duke kërkuar madje përjashtimin e përhershëm të klubit nga kompeticionet europiane.