Një operacion i gjerë i policisë kombëtare spanjolle është duke u zhvilluar në portin e Valencias. Media vendase “El Pais” shkruan se policia spanjolle ka arritur të godasë rrugën kryesore të hyrjes së kokainës së një karteli ballkanik në Spanjë. Si rezultat i operacionit u kapën më shumë se 1700 kilogramë kokainë në portin e Valencias dhe u arrestua një shqiptar, pjesë e anëtarëve të bandës. Në deklaratën e Agjencisë Tatimore dhe Policisë Kombëtare raportohet se shqiptari ka trajnime ushtarake dhe njohuri të larta operacionale, siç shkruan “El Pais”. Gjatë hetimeve u zbuluan mënyrat e ndryshme të veprimit që shqiptari pjesë e kartelit "Los Balkanes" përdorte për të fshehur drogën. Hetimi nisi kur agjentët mësuan se rrjeti kriminal mund të importonte çdo javë kontejnerë detarë me fruta nga Ekuadori, të cilat fshihnin sasi të konsiderueshme droge. Sa i përket drogës së sekuestruar, ajo ishte fshehur në kontejnerë me fruta nga Ekuadori në mënyra të ndryshme, duke përdorur vrima në frigoriferin e kontejnerëve, duke projektuar dysheme false mbi to ose trarë me zgavra brenda për të vendosur lëndën narkotike.