Kapiteneria e Portit të Durrësit ka ndaluar një ditë më parë, më 28 gusht, hyrjen në radën e portit të anijes “HANUMAN”. Sipas Kapitenerisë, anija me flamur të Sierra Leones ishte bosh dhe kishte kërkuar të hynte në port për shërbime dhe furnizime. Kërkesa, megjithatë, nuk është miratuar dhe anija nuk është lejuar të hyjë në port. “HANUMAN” është identifikuar nga GUR, Inteligjenca Ushtarake e Ukrainës, si pjesë e së ashtuquajturës “flota hije” ruse. Sipas të dhënave të GUR, të përditësuara më 10 qershor 2026, anija është lidhur me transportin e naftës ruse dhe produkteve të saj, në kundërshtim me regjimin e embargos së luftës dhe kufirit të çmimit të vendosur nga G7 dhe Bashkimi Europian. Po sipas GUR, në shtator të vitit të kaluar, “HANUMAN” transportoi më shumë se 30 mijë tonë produkte nafte ruse nga porti i Novorosijskut drejt Turqisë. Një vit më vonë, anija mbërriti bosh në Durrës për shërbime dhe furnizime, por hyrja e saj u ndalua nga Kapiteneria. Vendimi i autoriteteve portuale bëri që “HANUMAN” të mos hyjë në Portin e Durrësit.