Një ndërprerje masive e energjisë elektrike goditi rëndë Spanjën dhe Portugalinë, duke shkaktuar kaos në transport, panik te qytetarët dhe një sërë ndërhyrjesh emergjente. Mijëra njerëz mbetën pa energji dhe internet për orë të tëra, ndërsa shërbimet po rikthehen gradualisht në disa zona, sipas Rrjetit Spanjoll të Energjisë Elektrike. Ngjarja shkaktoi ndërprerje të theksuara në metrotë e Madridit dhe Barcelonës, ku pasagjerët mbetën të bllokuar në errësirë. Dhjetëra persona mbetën të ngujuar në ashensorë, duke detyruar ndërhyrjen e zjarrfikësve në më shumë se 60 raste. Në shumë qytete, semaforët dolën jashtë funksionit dhe qendrat tregtare mbetën në errësirë. Situata ndikoi rëndë edhe në transportin ajror dhe hekurudhor. Në Madrid dhe Barcelonë u regjistruan ndërprerje dhe anulime fluturimesh, ndërsa në aeroportin e Lisbonës u ndalën përkohësisht operacionet. Kryeministri Pedro Sánchez thirri një mbledhje të jashtëzakonshme të Këshillit të Sigurisë për të vlerësuar situatën. Sipas Agjencisë së Sigurisë Kibernetike të BE-së, hetimet paraprake tregojnë për një defekt teknik, jo një sulm kibernetik. Ndërprerja gjithashtu preku për pak minuta edhe zonën jugore të Francës, por autoritetet franceze konfirmuan se rrjeti i tyre mbetet i sigurt dhe i izoluar nga kriza. Për momentin, situata është nën kontroll dhe po ndiqet nga afër nga autoritetet kombëtare dhe ato europiane