Aeroporti i Brukselit është mbyllur të martën mbrëma pasi është raportuar prania e një droni në afërsi të pistës, ka bërë të ditur shërbimi belg i kontrollit të trafikut ajror. “Për disa orë nuk do të ketë as fluturime që nisen, as që mbërrijnë,” ka deklaruar zëdhënësja e aeroportit, duke shtuar se nuk është e qartë se sa do të zgjasë pezullimi i operacioneve ajrore. Sipas saj, vendimi është marrë për arsye sigurie, derisa autoritetet të verifikojnë situatën. Ngjarja ndodhi pak para orës 19:00, kur është vërejtur një dron pranë zonës së aeroportit, ka konfirmuar, zëdhënësi i shërbimit të kontrollit të trafikut ajror të Belgjikës. Si masë paraprake, fluturimet janë ndalur menjëherë. Edhe aeroporti më i vogël i Liezhit ka raportuar ndërprerje të përkohshme të fluturimeve, pasi janë parë dronë në hapësirën e tij ajrore. Autoritetet belge kanë nisur hetimet për të zbuluar origjinën e dronëve dhe për të vlerësuar nëse bëhet fjalë për një incident të izoluar apo për ndonjë rrezik më serioz për sigurinë ajrore.