Mijëra udhëtarë jashtë vendeve të Bashkimit Evropian, përfshirë edhe shqiptarët, po përballen me radhë të gjata, vonesa të mëdha dhe anulime fluturimesh në shumë aeroporte europiane, si pasojë e zbatimit të sistemit të ri të kontrollit kufitar të unionit, që nisi prej 10 prillit. Sistemi i ri kërkon regjistrimin biometrik të udhëtarëve nga vendet jashtë zonës Shengen, mes të cilave edhe Shqipëria, apo edhe Mbretëria e Bashkuar, duke përfshirë gjurmët e gishtërinjve dhe fotografi të fytyrës gjatë hyrjes dhe daljes. Radhë të gjata dhe vonesa u raportuan në fundjavë në disa nga aeroportet kryesore, përfshirë Gjenevën, Lisbonën dhe Maltën, ndërsa probleme u shfaqën edhe në Bruksel dhe Holandë, që raportuan pritje deri në dy orë në kontrollin e pasaportave. Në disa raste, udhëtarët përshkruan skena kaotike, me të moshuar dhe familje me fëmijë që prisnin për orë të tëra, ndërsa një pjesë e pikave automatike të kontrollit nuk funksiononin. Situata u rëndua më tej në Milano, ku disa pasagjerë raportuan se disa u ndjenë keq dhe humbën ndjenjat pas pritjes deri në tre orë në radhë.