Vetëm disa orë pasi institucionet shqiptare ishin njoftuar të mërkurën zyrtarisht nga ambasada e SHBA për pezullimin e fondeve të mbështetjes mbas urdhrit ekzekutiv të firmosur nga presidenti Donald Trump, media amerikane njoftoi se Shtëpia e Bardhë ishte tërhequr nga vendimi. Dhe këtu nisi kaosi... “The Washington Post” njoftoi rreth orës 20.00 të së mërkurës se Trump ishte tërhequr nga pezullimi i fondeve federale. Lajmi bëri xhiron e botës brenda pak minutash, ndërsa Shtëpia e Bardhë doli nxitimthi me një komunikatë duke pretenduar se ishte anuluar një memorandum nga Zyra e Menaxhimit dhe Buxhetit, jo urdhri ekzekutiv. Po çfarë është pezullimi i një memorandumi, derivat i një urdhri ekzekutiv të Presidentit të SHBA? Shumë media e cilësuan të paqartë dhe vendosën ta konsiderojnë një tërheqje të Trump për pezullimin e fondeve. Qëndrimin e tyre nuk e ndryshoi as deklarata e sekretares së Shtypit e Shtëpisë së Bardhë, Karoline Leavitt që theksoi se “Ky nuk është një anulim i ngrirjes së financimit federal. Është thjesht një anulim i memorandumit të Zyrës së Menaxhimit dhe Buxhetit. Pse ndodh kjo? Për t’i dhënë fund çdo konfuzioni të krijuar nga urdhri i gjykatës. Urdhrat ekzekutiv të Presidentit për financimin federal mbeten në fuqi dhe efekt të plotë dhe do të zbatohen me rigorozitet”, shkruante ajo në platformën X. Aq e koklavitur u bë situata, sa edhe “BBC” njoftoi se i ka kërkuar zyrtarisht Shtëpisë së Bardhë të sqarojë ndryshimin mes pezullimit të memorandumit dhe pezullimit të urdhrit ekzekutiv. Urdhri ishte planifikuar të hynte në fuqi në orën 17:00. të së martës, por u pezullua nga një gjykatës federal të paktën deri të hënën pas një seance gjyqësore urgjente të kërkuar nga grupet jofitimprurëse që marrin fonde federale. Kur presidenti Trump u pyet rreth dy orë më vonë në një konferencë për shtyp ai gjithashtu ishte i paqartë. Ose më saktë, e vuri theksin diku tjetër: te qendra e re për emigrantët që do të hapë në Guantanamo. “Do të jetë një kamp për refugjatët me një kapacitet prej 30 mijë personash. Aty do të çojmë emigrantët më të rrezikshëm për t’u treguar të gjithëve se Amerika nuk mund të shfrytëzohet më. Jemi vendi që presim më shumë emigrantë dhe kjo do të marrë fund”. Trump kërcënoi edhe punonjësit e administratës që punonin nga shtëpia. “Duhet të kthehen fizikisht në punë, ose do të firmos pushimin e tyre nga puna”, deklaroi ai.