Kandidati i “Bashkë Fitojmë” në Lushnjë, Eduart Sharka ka votuar në orën 10:00 më qendrën e votimit, në kopshtin numër 2 të Lushnjës. Ai ka bërë thirrje qytetarëve të votojnë, ndërsa denoncon “patronazhistët e PS”. “Përfitoj nga rasti t’i bëj thirrje qytetarëve të mi të dalin në votime. Sot është dita që zëri i tyre të dëgjohet. Vota është mekanizmi që ekziston në demokraci për të shprehur vullnetin, u bëj thirrje të dalin masivisht në votime. Përfitoj nga rasti të denoncoj dy fenomene që kam hasur sot gjatë votimeve. Funksionon aplikacioni Aktivisti, ku vëzhguesit e kundërshtarit tim politik marrin informacion te qendra e votimit për të lajmëruar njerëzit që s’kanë shkuar të votojnë dhe tjetra, përfaqësues të PS rrinë më afër se 100 metra te qendra e votimit. Këto janë konstatime që i kemi bërë vetë dhe i kemi denoncuar në KZAZ”, tha Sharka.