Katër në dhjetë raste me kancer në rang global mund të parandalohen. Studimi më i fundit i Organizatës Botërore të Shëndetësisë dhe Agjencisë Ndërkombëtare për Kërkimet mbi Kancerin, publikuar në Ditën Botërore të Kancerit, 4 shkurt, zbulon 30 faktorë të parandalueshëm, duke përfshirë duhanin, alkoolin, mungesën e aktivitetit fizik, ndotjen e ajrit, rrezatimin ultravjollcë – dhe për herë të parë – nëntë infeksione që shkaktojnë kancer. Analiza e OBSH vlerëson se 37% e të gjitha rasteve të reja të kancerit në vitin 2022, rreth 7.1 milionë raste, ishin të lidhura me faktorë të parandalueshëm. Duke u bazuar në të dhëna nga 185 vende dhe 36 lloje kanceri, studimi identifikon duhanin si shkakun kryesor të kancerit, përgjegjës për 15% të të gjitha raste të reja të sëmundjes, i ndjekur nga infeksionet me 10% dhe konsumimi i alkoolit me 3%. Tre lloje kanceri, ai i mushkërive, i stomakut dhe i qafës së mitrës, përbëjnë pothuajse gjysmën e të gjitha rasteve të kancerit të parandalueshëm, si te burrat ashtu edhe te gratë, në nivel global. "Adresimi i këtyre faktorëve të parandalueshëm përfaqëson një nga mundësitë më të mëdha për të zvogëluar barrën globale të kancerit”, thanë drejtuesit e studimit. Sipas hulumtuesve, adresimi i faktorëve të parandalueshëm jo vetëm që zvogëlon përhapjen e kancerit, por gjithashtu ul kostot afatgjata të kujdesit shëndetësor dhe përmirëson shëndetin dhe mirëqenien e popullsisë.