34 individë dhe entitete në Iran, përfshire pjesëtarë të Gardës Revolucionare dhe policinë e moralit, janë sanksionuar nga qeveria e Kanadasë. Sanksionet, sipas ministres së jashtme kanadeze, Melanie Joly, janë në përgjigje “të shkeljeve të rënda të të drejtave të njeriut” të kryera në republikën islamike, përshirë “persekutimin sistematik” të grave në veçanti, dhe veprimeve “skandaloze” të kryera nga policia e moralit, që çuan në vdekjen e Mahsa Aminit, 22 vjeçe, e cila ndërroi jetë pas u vendos në paraburgim pasi nuk kishte vendosur “sic duhet hixhabin”. “Irani ka vazhduar të kryejë shkelje të rënda të ligjit ndërkombëtar, shkelje që janë të dokumentuara, përfshirë edhe shpërfilljen ndaj jetës së njerëzve”, thuhet në një deklaratë të saj. Lista përfshin 25 individë dhe nëntë entitete. Në shënjestrën e Kanadasë kanë përfunduar ems të tjerësh gjeneralmajori i Gardës Revolucionare Mohammed-Hossein Bagheri, shefi i stafit të forcave të armatosura të Iranit gjeneralmajor Hossein Salami, komandanti suprem i Gardës Revolucionare Esmail Qaani, komandanti i forcave Kuds Evin Prison, dhe kreu i policisë së moralit Mohammad Rostami Cheshmeh Gachi. Autoritetet iraniane ende vazhdojnë të pretendojnë se Amini u shua nga një atak kardiak në 16 shtator, por të afërmit e saj dhe shumë iranianë të tjerë i hedhin poshtë këto pretendime e thonë se 22 vjecarja vdiq pasi u rrah brutalisht nga policia. Vdekja e saj shkaktoi një valë protestash në vend, të cilat vazhdojnë prej ditësh. Por lidershipi Iranian duket nuk ka ndërmend të zbutet përpara indinjatës popullore. Lideri suprem i Iranit, Ajatollah Ali Khamenei, fajësoi ndikimet e huaja për trazirat që kanë pushtuar një sërë qytete të vendit dhe deklaroi se forcat e sigurisë kanë mbështetjen e plotë të tij për të shtypur protestat. Pamjet: AFP