Kanadaja pritet të vendosë më 8 shtator tarifa të reja ndaj më shumë se 700 produkteve amerikane, me norma që variojnë nga 15% deri në 50%, njoftuan të martën zyrtarët kanadezë. Në mënyrë të veçantë, Otava do të dyfishojë tarifat për çelikun dhe aluminin amerikan, duke i çuar në 50%, në të njëjtin nivel me tarifat që Shtetet e Bashkuara kanë vendosur ndaj çelikut dhe aluminit kanadez. Zyrtarët kanadezë e kanë paraqitur masën si një përpjekje për të mbrojtur industrinë prodhuese të vendit. “Tarifat e vendosura së fundmi nga SHBA-ja ndaj mallrave kanadeze do të kenë pasoja reale për punëtorët, bizneset dhe komunitetet kanadeze në të gjithë vendin”, deklaroi ministri kanadez i Financave, François-Philippe Champagne, gjatë një konference për shtyp. “Kanadaja duhet të përgjigjet dhe sot po e bëjmë këtë në mënyrë proporcionale, të shënjestruar dhe strategjike”, shtoi ai. Masat hakmarrëse janë vetëm një nga instrumentet që Kanadaja mund të përdorë në përshkallëzimin e luftës tregtare me Shtetet e Bashkuara. Përveç çelikut dhe aluminit, tarifat e reja kanadeze prekin sektorë të tillë si produktet e letrës, materialet e ndërtimit, pajisjet elektroshtëpiake dhe produktet bujqësore, përfshirë bulmetin dhe prodhimet e detit. Sipas të dhënave tregtare amerikane, tarifat e fundit të vendosura nga SHBA-ja prekin rreth 5% të mallrave që vendi importoi nga Kanadaja vitin e kaluar. Ndërkohë, tarifat kanadeze prekin rreth 6% të mallrave që SHBA-ja eksportoi drejt Kanadasë. Kanadaja është tregu i dytë më i madh i eksporteve për mallrat amerikane dhe një nga destinacionet kryesore për shumë prej produkteve që do të preken nga tarifat e reja. Vitin e kaluar, Kanadaja ishte tregu më i madh i eksporteve për pajisjet elektroshtëpiake amerikane, duke blerë produkte me vlerë mbi 1 miliard dollarë. Shumica e tyre tani do t’i nënshtrohen një tarife prej 25%. Në të njëjtën kohë me masat hakmarrëse, autoritetet kanadeze njoftuan një paketë prej 7.5 miliardë dollarësh kanadezë, rreth 5.4 miliardë dollarë amerikanë, për të mbështetur bizneset vendase të prekura nga tarifat. Rreziku për kompanitë amerikane është se tarifat e larta kanadeze mund të ulin kërkesën për produktet e tyre. Kjo mund t’i detyrojë kompanitë të reduktojnë orët e punës ose, në disa raste, të shkurtojnë vende pune. Presidenti amerikan Donald Trump ka sinjalizuar se mund ta përshkallëzojë edhe më tej përplasjen tregtare me Kanadanë. Të hënën, Trump kërcënoi se, duke nisur nga 1 janari, mund të dyfishojë në 50% tarifat ndaj makinave dhe pjesëve të automjeteve kanadeze.