Kompania ajrore “Delta Airlines” po ofron nga 30 mijë dollarë për çdo pasagjer që ishte në aeroplanin që u përplas gjatë uljes në aeroportin e Torontos të hënën, ku pr fat të mirë të gjithë personat në aeroplan mbijetuan. Aeroplani u rrotullua pasi u ul dhe u përmbys. Edhe vetë pasagjerët u shprehën të befasuar që shumica shpëtuan pa lëndime. Mbetet ende e paqartë se çfarë shkaktoi incidentin, ndërsa hetimet po vazhdojnë. Në aeroplan ishin 76 pasagjerë dhe katër pjesëtarë të ekuipazhit, ndërsa avioni ishte nisur nga Minneapolis, SHBA. Zëdhënësi i kompanisë “Delta” tha se paratë e ofruara nuk ndikojnë në të drejtat e klientëve. Ekuipazhi i aeroplanit dhe ekipet emergjente u vlerësuan maksimalisht për reagimin e shpejtë për t'i nxjerrë pasagjerët. 21 prej udhëtarëve morën lëndime dhe u dërguan në spital, ndërsa deri të mërkurën, me përjashtim të njërit të gjithë tjerët u larguan nga spitali.