Qarkullimi i mjeteve të transportit të mallrave në pikat kufitare të Shqipërisë me Malin e Zi dhe Maqedoninë e Veriut do të bllokohet përkohësisht për shkak të protestave të paralajmëruara nga shoqatat e transportit në këto dy shtete. Autoritetet malazeze kanë njoftuar se më 26 janar 2026, duke nisur nga ora 11:30 dhe për një periudhë 48-orëshe, Shoqata e Kamionistëve të Republikës së Malit të Zi do të zhvillojë një protestë. Për arsye sigurie dhe për të shmangur bllokimin e akseve rrugore apo incidente të mundshme, nuk do të lejohet qarkullimi i mjeteve të tonazhit të rëndë nga Shqipëria drejt Malit të Zi deri në përfundim të protestës. Gjatë kësaj periudhe, drejt vendkalimeve kufitare do të lejohen të qarkullojnë vetëm automjetet e vogla, mjetet e emergjencës, autobusët dhe mjetet e transportit të pasagjerëve. Ndërkohë, bllokime të përkohshme janë paralajmëruar edhe në pikat kufitare me Maqedoninë e Veriut. Për shkak të një proteste që pritet të zhvillohet në territorin e këtij shteti nga një shoqatë e transportit të mallrave, duke filluar nga ora 00:01 e datës 26 janar 2026 do të bllokohet hyrja e mjeteve transportuese të mallrave në Maqedoninë e Veriut, ndërsa nga ora 12:00 e së njëjtës ditë do të bllokohet edhe dalja e tyre nga territori maqedonas. Nga ky bllokim do të përjashtohen mjetet e tonazhit të rëndë që transportojnë medikamente mjekësore ose bagëti, të cilat do të lejohen të qarkullojnë normalisht. Lëvizja e automjeteve të udhëtarëve nuk do të preket dhe do të vijojë pa kufizime. Autoritetet kufitare u bëjnë thirrje subjekteve të transportit dhe drejtuesve të mjeteve të informohen në kohë dhe të marrin masat e nevojshme për të shmangur vonesat dhe problematikat gjatë kësaj periudhe.