Nënpresidentja Kamala Harris ka siguruar mbështetjen e një numri të mjaftueshëm delegatësh demokratë, për t’u bërë kandidatja e partisë për presidente, njoftoi të premten kryetari i Komitetit Kombëtar Demokrat, Xhemi Herrison. Procesi i votimit në distancë vazhdon deri të hënën, por ekipi elektoral njoftoi se u kalua pragu i nevojshëm për të siguruar shumicën e votave të delegatëve. Zonja Harris pritet tashmë të bëhet kandidatja e parë zyrtare për presidente e një prej partive kryesore, që është me origjinë afrikano-amerikane dhe nga Azia juglindore. “Jam e nderuar të jem kandidatja e pritshme demokrate”, tha zonja Harris gjatë një telefonate me mbështetësit. Demokratët po vazhdojnë procesin e votimit virtual për të emëruar kandidate zyrtare zonjën Harris, duke iu afruar kështu përfundimit të një procesi që u trazua nga vendimi i Presidentit Joe Biden për të mos rikandiduar. Emërimi zyrtar pritet të finalizohet deri më 7 gusht, megjithëse kuvendi në Çikago do të fillojë pas dy javësh. Zyrtarët demokratë kanë thënë se procedura e përshpejtuar ishte e nevojshme për shkak të afatit të vendosur deri në 7 gusht në Ohajo për regjistrimin e kandidatëve.