Zëvendëspresidentja Kamala Harris ka pranuar rezultatin e zgjedhjeve duke telefonuar Donald Trump për ta uruar për fitoren. Kjo telefonatë i jep fund zyrtarisht garës së ashpër mes zëvendëspresidentes dhe ish-presidentit. Zëdhënësja tha se gjatë telefonatës, ajo theksoi rëndësinë e një ndryshimi paqësor të pushtetit. Harris pritet të mbajë fjalimin e pare pas humbjes më vonë këtë pasdite. Harris ka siguruar deri tani 224 vota elektorale. Përveç kësaj, republikanët morën kontrollin në Senatin prej 100 anëtarësh të martën vonë, por ende nuk dihet se cila parti do të kontrollojë Dhomën e Përfaqësuesve. Kandidati republikan Donald Trump u zgjodh presidenti i 47-të i Shteteve të Bashkuara, duke shënuar një rikthim të jashtëzakonshëm. Trump arriti të siguronte 277 vota elektorale nga 270 sa janë të nevojshme për të siguruar presidencën. Mëngjesin e së mërkurës ndërsa ende po numëroheshin votat, Trump shpalli fitoren në një tubim në Florida. “Kjo ishte një lëvizje që askush nuk e ka parë ndonjëherë më parë dhe sinqerisht, kjo ishte, besoj, lëvizja më e madhe politike e të gjitha kohërave”, u tha Trump mbështetësve të tij.