Vetëm një orë pasi e telefonoi Donald Trumpin për ta uruar, Kamala Harris mbajti fjalimin që zgjati 11 minuta e 30 sekonda duke dhënë mesazhe përbashkimi për amerikanët. Disa nga mediat ndërkohë e interpretuan fjalimin e saj si një paralajmërim se ajo mund të jetë sërish kandidatja e amerikanëve pas 4 vitesh. “Unë kurrë nuk do dorëzohem për amerikanët që luftojnë për ëndrrat e tyre, ku gratë amerikane nuk do të kenë frikë të zgjedhin çfarë të bëjnë me trupin e tyre dhe jo qeveria të vendosë për to. Ne e pranojmë rezultatin. Kjo na dallon ne nga të tjerët. Nuk do të dorëzohemi kurrë së luftuari për demokracinë tonë. Nuk do heqim kurrë dorë për drejtësi të barabartë dhe idenë e shenjtë se çdo njeri prej nesh, ka disa të drejta thelbësore që duhet të respektohen”. Gjatë orëve të pasdites pjesëtarë të stafit të Kamala Harris deklaruan se ajo humbi edhe për shkak të Biden duke shkaktuar furtunë në media. Harris e shmangu debatin dhe thjesht e falënderoi presidentin Biden siç e do protokolli në të tilla raste. “Ne do vazhdojmë betejën për të luftuar për dinjitetin që gjithë njerëzit meritojnë. Për të rinjtë që po na ndjekin, ju dua të gjithëve. Për të rinjtë ndihen të zhgënjyer ju them se çdo gjë do shkojë mirë. Ndonjëherë beteja do pak kohë, por kjo nuk do të thotë që ne nuk do të fitojmë. Kurrë mos hiqni dorë për ta bërë botën më të mirë. Ju keni pushtet, mos e besoni asnjëherë kur ju thonë që është e pamundur”.