Bashkimi Evropian i ka parë si shqetësuese proceset e njëpasnjëshme zgjedhore në Kosovë. Shefja për politikë të jashtme e Bashkimit Evropian, Kaja Kallas, të hënën tha se për shkak të zgjedhjeve ka vonesa edhe në procesin dialogues mes Kosovës dhe Serbisë. “Ne në fakt kishim planifikuar dialogun Beograd-Prishtinë në nivel të lartë politik. Kisha marrë pajtimin nga të dy liderët, si nga Kosova ashtu edhe nga Serbia, por tani në Kosovë po afrohen sërish zgjedhjet, gjë që natyrisht e shtyn këtë proces” Para takimit që pati me ministrat e Jashtëm të Ballkanit Perëndimor dhe të Evropës, Kallas shtoi se po punon me palët për zbatimin e marrëveshjeve të arritura deri tash në dialog. Por, përpos vonesave në procesin e negociatave me Serbinë, njohësit thonë që Kosova po e humb hapin edhe në procesin e integrimit në bllok.