Agjencia Shtetërore e Kadastrës do të nisë nga Palasa trajtimin e banesave pa dokumentacion pronësie, një proces që do të shtrihet në të gjithë vendin. Drejtoresha e Përgjithshme e Kadastrës, Lorena Goxhobelli, theksoi se duke filluar nga e mërkura, specialistët e Kadastrës do të zbresin në terren, duke kontaktuar banorët dhe trajtuar të gjitha rastet. “Kadastra do të trajtojë banesat pa dokumentacion pronësie me një qasje tjetër. Kadastra shkon derë më derë. Procesi nis nesër në Palasë, ku ekipet e Kadastrës do të qëndrojnë për një javë, me qëllim trajtimin e të gjitha banesave pa dokumentacion pronësie në këtë zonë. Më pas, nisma do të vijojë me radhë në fshatra të tjerë në të gjithë vendin. Ju kërkojmë banorëve të Palasës të bashkëpunojnë me specialistët në terren, të njoftojnë familjarët, të afërmit dhe fqinjët, si dhe të sigurohen që gjatë vizitës së ekipeve të ketë një person në banesë për t’i pritur ata. Specialistët do të kryejnë matjet në terren, do të verifikojnë dhe saktësojnë dokumentacionin, ndërsa për çdo rast që plotëson kriteret ligjore do të merret vendimi përkatës, i cili do t’i dërgohet qytetarit direkt përmes platformës e-Albania. Ekipet e Kadastrës do të jenë gjatë gjithë kohës në terren, në zonat ku kryhet puna, duke iu dhënë mundësi qytetarëve të informohen qartë për fazën në të cilën ndodhet dosja e tyre. Pas verifikimeve, Agjencia Shtetërore e Kadastrës do të publikojë statusin e të gjitha banesave të trajtuara, duke bërë të qartë se cilat prej tyre janë pajisur me vendim, cilat raste kërkojnë plotësimin e dosjes me dokumente që Kadastra nuk mund t’i sigurojë vetë, siç mund të jetë dëshmia e trashëgimisë, si dhe rastet kur ekipet nuk kanë mundur të aksesojnë banesën.