Joe Biden u nis sot në udhëtimin e tij të parë të presidencës, duke u krenuar për një aleancë të fortë transatlantike para samitit të G7, takimeve me partnerë të NATO-s dhe BE, e më tej në përballjen kokë më kokë me Vladimir Putin ne Gjeneve. Duke marrë avionin presidencial Air Force One jashtë Uashington, Biden tha se udhëtimi i tij kishte si qëllim "t’i bëjë të qartë Putin e Kinës se aleanca SHBA-BE është e ngushtë”. Presidenti 78-vjecar do të ndalojë fillimisht në Britani për samitin e G7 që zgjat nga e premtja deri të dielën në një rezort bregdetar të krahinës Cornwall. Prej andej me ndalesa të shpejta ai do të takohet me mbretëreshën Elizabeth në kështjellën Windsor, e do të fluturojë drejt Brukselit për takime me udhëheqës të aleancës së Nato-s dhe të Bashkimit Evropian. Turneu i tij evropian do të përfundojë në Gjenevë ku do të takohet me liderin rus Vladimir Putin, të mërkurën që vjen. Maratona diplomatike e Biden duket se ka si qëllim të rikthejë SHBA në qendër të lidershipit botëror, me axhendën ndërkombëtare që do të përfshijë çështje si donacionet e vaksinave për vendet e varfra, ringjallja ekonomive në periudhën post-pandemi si dhe mobilizimin e vendeve aleate kundër ‘kërcënimit’ të Rusisë e Kinës. “Kjo është çështja e epokës sonë,” shtoi Biden para udhëtimit për The Washington Post.