Presidenti Donald Trump pritet të nënshkruajë tre urdhra ekzekutivë që do të riformojnë ushtrinë, duke përfshirë ndalimin e anëtarëve transgjinorë që të shërbejnë në forcat e armatosura të SHBA-së, heqjen e programeve të Diversitetit, Barazisë dhe Përfshirjes (DEI) në ushtri, si dhe rikthimin në shërbim të anëtarëve të larguar pasi refuzuan vaksinimin kundër Covid-19, sipas dy zyrtarëve të Shtëpisë së Bardhë që folën për CNN. Urdhrat, të cilët u raportuan fillimisht nga New York Post, vijnë ndërsa kandidati i Trump për të udhëhequr Pentagonin, Pete Hegseth, u betua si sekretar i mbrojtjes të shtunën. Ai ka deklaruar prej kohësh se planifikon të zbatojë ndryshime të mëdha në ushtri. Trump kishte ndaluar amerikanët transgjinorë të shërbenin në ushtri në vitin 2017 gjatë administratës së tij të parë, por ish-presidenti Joe Biden lëshoi një urdhër në vitin 2021 duke shfuqizuar ndalimin. Ndërsa tani, urdhri që pritet të nënshkruhet nga Trump shkon edhe më tej, tha një nga zyrtarët, dhe do të përcaktojë standarde të reja ushtarake në lidhje me përemrat gjinorë, duke deklaruar se gatishmëria mendore dhe fizike kërkon ndalimin e anëtarëve transgjinorë nga ushtria.