Teksa në kampin e Gjadrit mbërriti këtë të premte kontingjenti i dytë me 15 emigrantë, opozita italiane ngre shqetësimin për sigurinë. “Jeta dhe siguria e emigrantëve në kampin e Gjadrit, në Shqipëri, është në rrezik”! Kështu u shprehën eurodeputetja Cecilia Strada dhe deputetja e Partisë Demokratike në Itali, Rachele Scarpa, të cilat i kërkuan Këshillit të Evropës që të ndërhyjë me urgjencë, pasi sipas tyre, po shkelen të drejtat themelore të emigrantëve. Sipas eurodeputetes dhe deputetes italiane, në gjatë 13 ditëve monitorim në Gjadër, që po shërben si Qendër Paraburgimi për emigrantët që presin të riatdhesohen, janë shënuar afërsisht 10 tentativa vetëvrasjeje. “E pamë qendrën me sytë tanë, folëm me pothuajse të gjithë personat e ndaluar në dy javët e para dhe konsultuam në thellësi regjistrin e ngjarjeve kritike, duke zbuluar një pamje shumë serioze. Ekspertët e Këshillit të Evropës duhet të bëjnë një vizitë urgjente, për të hetuar legjitimitetin dhe proporcionalitetin e këtyre masave”, theksojnë dy parlamentaret në një raport me shkrim, pas inspektimit në kampin e Gjadrit. “Më shqetësuese”, shprehen politikanet italiane, “është gjendja psiko-fizike e emigrantëve të mbyllur në kamp, pasi në dy javë, janë regjistruar 35 ngjarje kritike, kryesisht akte të rënda të vetëlëndimit, deri në tentativë vetëvrasjeje”.